മുംബൈ: നാല് വയസുകാരിയെ ക്രൂരമായി കൊലപ്പെടുത്തി. ഇരു കൈകളും വെട്ടിമാറ്റിയ നിലയിലാണ് പെണ്‍കുട്ടിയുടെ മൃതദേഹം കണ്ടെത്തിയത്. പായല്‍ പ്രസാദ് (4) എന്ന പെണ്‍കുട്ടിയാണ് കൊല്ലപ്പെട്ടത്. കുട്ടിയുടെ തലയിലും ആഴത്തിലുള്ള മുറിവുണ്ട്. മുംബൈയിലെ ബിവന്‍ഡി പോലീസ് സ്റ്റേഷന്റെ പരിധിയിലാണ് സംഭവം. സംഭവുമായി ബന്ധപ്പെട്ട് ഇരുപതോളം പ്രദേശവാസികളെ പോലീസ് ചോദ്യം ചെയ്തു.
ബിവന്‍ഡിയിലെ ഗൗതം നഗറിലെ വീടിന് മുന്നില്‍ കളിച്ചു കൊണ്ടിരിക്കുകയായിരുന്ന പെണ്‍കുട്ടിയെ ചൊവ്വാഴ്ച കാണാതാവുകയായിരുന്നു. കുട്ടിയ്ക്കായി അന്വേഷണം പുരോഗമിക്കുന്നതിനിടെയാണ് ഇന്ന് മരിച്ച നിലയില്‍ കണ്ടെത്തിയത്. സഹോദരനൊപ്പമാണ് പായല്‍ കളിച്ചുകൊണ്ടിരുന്നത്. ഇടയ്ക്ക് സഹോദരന്‍ വീട്ടിലേക്ക് പോയി. അല്‍പ്പ സമയത്തിന് ശേഷം സഹോദരിയെ കൂട്ടിക്കൊണ്ട് പോകാന്‍ സഹോദരന്‍ വന്നപ്പോഴാണ് പെണ്‍കുട്ടിയെ കാണാനില്ലെന്ന് വ്യക്തമായത്.
കുട്ടിയുടെ സഹോദരന്‍ ഇക്കാര്യം മാതാപിതാക്കളെ അറിയിക്കുകയും മാതാപിതാക്കള്‍ പോലീസില്‍ പരാതി നല്‍കുകയുമായിരുന്നു. പോലീസ് അന്വേഷണത്തില്‍ പെണ്‍കുട്ടിയുടെ വീട്ടില്‍ നിന്നും മുന്നൂറ് മീറ്റര്‍ അകലെ മൃതദേഹം കണ്ടെത്തി. കൈകള്‍ രണ്ടും വെട്ടിമാറ്റിയ നിലയിലാണ്. എന്നാല്‍ ഏറെ നേരത്തെ അന്വേഷണത്തിന് ശേഷവും കൈകള്‍ കണ്ടെത്താനായിട്ടില്ല.
പെണ്‍കുട്ടിയുടെ പിതാവ് പാന്‍ ഷോപ്പ് നടത്തുകയാണ്. ഇയാളുമായി ആര്‍ക്കെങ്കിലും ശത്രുതയുണ്ടോയെന്നാണ് പോലീസ് അന്വേഷിക്കുന്നത്. അയല്‍വാസികളും പെണ്‍കുട്ടിയുടെ ബന്ധുക്കളും പോലീസ് നിരീക്ഷണത്തിലാണ്. പെണ്‍കുട്ടിയെ നരബലി നല്‍കിയതാണെന്ന് കരുതുന്നില്ലെന്ന് പോലീസ് വ്യക്തമാക്കി. കൊലപാതക കേസ് രജിസ്റ്റര്‍ ചെയ്താണ് പോലീസ് അന്വേഷണം പുരോഗമിക്കുന്നത്.
