തൃശ്ശൂര്‍: തൃശ്ശൂരിലെ എന്‍ഡിഎ സ്ഥാനാര്‍ത്ഥി സുരേഷ് ഗോപിക്ക് വേണ്ടിയുള്ള തെരഞ്ഞെടുപ്പ് പ്രചാരണത്തില്‍ ‘ശബരിമല’യും ‘പുല്‍വാമ’യും പരാമര്‍ശിച്ച് ബിജെപി അദ്ധ്യക്ഷന്‍ അമിത് ഷാ. ശബരിമല വിശ്വാസസംരക്ഷണത്തിന് ഏതറ്റം വരെയും പോകുമെന്നും അയ്യപ്പവിശ്വാസികള്‍ക്കൊപ്പം ഉണ്ടാകുമെന്നും പറഞ്ഞ അമിത് ഷാ, ശബരിമലയുടെ വിശുദ്ധി തകര്‍ക്കാന്‍ കമ്മ്യൂണിസ്റ്റ് സര്‍ക്കാര്‍ ശ്രമിച്ചെന്നും ആരോപിച്ചു. തൃശ്ശൂര്‍ തേക്കിന്‍കാട് മൈതാനത്ത് നടത്തിയ പ്രചാരണപരിപാടിയില്‍ സംസാരിക്കുകയായിരുന്നു അമിത് ഷാ.
‘കേരളത്തിലെ സര്‍ക്കാര്‍ സുപ്രീംകോടതി വിധിയുടെ മറ പിടിച്ച് ഭക്തര്‍ക്കെതിരെ അക്രമം അഴിച്ചുവിട്ടു. 30000 പേരെയെങ്കിലും ജയിലില്‍ പിടിച്ചിട്ടു. നിരവധി സുപ്രീംകോടതി വിധികള്‍ ഇവിടെ നടപ്പാകാതെ കിടക്കുന്നു. ശബരിമല വിധി മാത്രം നടപ്പാക്കാന്‍ എന്താണ് ഇത്ര തിടുക്കം?’, അമിത് ഷാ ചോദിച്ചു.
‘ശബരിമല വിശ്വാസസംരക്ഷണത്തിനൊപ്പം അയ്യപ്പവിശ്വാസികള്‍ക്കൊപ്പം ബിജെപി ഉണ്ടാകും. ബിജെപി പ്രകടനപത്രികയില്‍ ശബരിമലയിലെ വിശ്വാസങ്ങള്‍ സംരക്ഷിക്കുമെന്നും അത് സുപ്രീംകോടതിയുടെ മുമ്പാകെ എത്തിക്കുമെന്നും പറഞ്ഞത് അതുകൊണ്ടാണ്. ശബരിമലയില്‍ പൊലീസിനെ നിര്‍ത്തി സമരത്തെ തകര്‍ക്കാനുള്ള ശ്രമമാണ് നടത്തിയത്. ഡിവൈഎഫ്‌ഐക്കാരെ പോലും പൊലീസ് വേഷം കെട്ടിച്ച് നിര്‍ത്തി. ശബരിമലയുടെ പരിശുദ്ധി നശിപ്പിക്കാന്‍ ശ്രമിച്ചാല്‍ ഏത് തരത്തിലുള്ള പ്രക്ഷോഭങ്ങളും ബിജെപി നടത്തും. അതിനായി ഏതറ്റം വരെയും പോകും’, തെരഞ്ഞെടുപ്പ് പരിപാടിയില്‍ അമിത് ഷാ പറഞ്ഞു.
‘പുല്‍വാമ ഭീകരാക്രമണത്തിന് മറുപടിയുമായി നരേന്ദ്രമോദി ഉടന്‍ തന്നെ തിരികെ പാകിസ്ഥാനില്‍ വ്യോമാക്രമണം നടത്തി. രാജ്യത്തിന്റെ സേന തിരിച്ചടിച്ചു. സാം പിത്രോദ പ്രത്യാക്രമണത്തിന് തെളിവ് ചോദിച്ചില്ലേ? ഭീകരവാദികളുമായി ചര്‍ച്ച വേണോ, അതോ അവര്‍ക്ക് നേരെ ബോംബ് വര്‍ഷിക്കണോ, നിങ്ങള്‍ തന്നെ പറയണം’, അമിത് ഷാ ചോദിച്ചു.
