ന്യൂഡല്‍ഹി: രാജ്യത്തെ ആഭ്യന്തര ടൂറിസത്തെ പ്രോത്സാഹിപ്പിക്കുന്നതിനുള്ള പദ്ധതികള്‍ ആവിഷ്‌കരിക്കുമെന്ന് കേന്ദ്രധനമന്ത്രി നിർമല സീതാരാമൻ.
ലക്ഷദ്വീപ് ഉള്‍പ്പെടെയുള്ള രാജ്യത്തെ ദ്വീപുകളുടെ വികസനത്തിനായി പ്രത്യേക സഹായങ്ങള്‍ നല്‍കും. ലക്ഷദ്വീപിലെ ടൂറിസം മേഖല നേരിടുന്ന പ്രശ്‌നങ്ങള്‍ക്ക് പരിഹാരം കാണുമെന്നും മന്ത്രി ബറ്റില്‍ പ്രഖ്യാപിച്ചു.
കടല്‍- വിമാന മാർഗങ്ങളിലൂടെയാണ് ലക്ഷദ്വീപിലേക്ക് സഞ്ചാരികളെത്തുന്നത്. അതിനാല്‍ തുറമുഖമേഖലയിലെ വികസനത്തിന് കേന്ദ്രസർക്കാർ ഊന്നല്‍ നല്‍കും. സഞ്ചാരികള്‍ക്ക് മികച്ച സഞ്ചാരാനുഭവം നല്‍കുന്നതിനായി ഈ മേഖലയിലെ അടിസ്ഥാന സൗകര്യങ്ങള്‍ വികസിപ്പിക്കും. 11 ലക്ഷം കോടിയാണ് അടിസ്ഥാന സൗകര്യ വികസനത്തിനായി വകയിരുത്തിയിരിക്കുന്നതെന്നും ധനമന്ത്രി പറഞ്ഞു.
മാലദ്വീപുമായുള്ള നയതന്ത്ര തർക്കത്തിനുപിന്നാലെയാണ് ലക്ഷദ്വീപിലെ ടൂറിസത്തിനു കേന്ദ്രസർക്കാർ ശ്രദ്ധനല്‍കുന്നത്.
