ഇടുക്കി: വൃദ്ധയായ അമ്മയെ മുറിയില്‍ പൂട്ടിയിട്ട് ഭിന്നശേഷിക്കാരിയെ ബലാത്സംഗം ചെയ്തയാള്‍ അറസ്റ്റില്‍. തൊടുപുഴ കരിങ്കുന്നത്താണ് സംഭവം. കരിങ്കുന്നം സ്വദേശി വാഴമലയില്‍ വീട്ടില്‍ മനു(45) ആണ് അറസ്റ്റിലായത്. വീട്ടില്‍ അതിക്രമിച്ച് കയറല്‍, ആവര്‍ത്തിച്ചുള്ള ബലാത്സംഗം, ഭീഷണിപ്പെടുത്തല്‍ തുടങ്ങിയ കുറ്റങ്ങള്‍ ചുമത്തിയാണ് പ്രതിക്കെതിരെ കേസ് എടുത്തിരിക്കുന്നത്.
ഈ മാസം നാലിനായിരുന്നു കേസിനാസ്പദമായ സംഭവം. വീട്ടില്‍ ജോലിക്ക് വന്ന ഇയാള്‍ 76-കാരിയെ വീട്ടില്‍പൂട്ടിയിട്ട ശേഷം ഇവരുടെ മകളായ നാല്‍പ്പത്തിയാറുകാരിയായ ഭിന്നശേഷിക്കാരിയെയാണ് ബലാത്സംഗം ചെയ്തത്. അവശനിലയിലായ മകളെ അമ്മ തന്നെയാണ് പിന്നീട് ആശുപത്രിയില്‍ എത്തിച്ചത്. അമ്മയുടെ പരാതിയുടെ അടിസ്ഥാനത്തിലാണ് പൊലീസ് കേസെടുത്തത്. സംഭവത്തിന് ശേഷം കടന്നുകളഞ്ഞ ഇയാളെ പൊലീസ് നടത്തിയ അന്വേഷണത്തില്‍ കണ്ടെത്തുകയായിരുന്നു.
