കൊച്ചി: വഴിയിലാകുന്ന സര്ക്കാര് വാഹനങ്ങള് കട്ടപ്പുറത്താക്കി റിപ്പയറിങ്ങിന്റെ മറവില് ലക്ഷങ്ങള് തട്ടുന്ന തസ്ക്കരസംഘം സംസ്ഥാനത്ത് വ്യാപകം. ഒരുകൂട്ടം സര്ക്കാര് എഞ്ചിനിയര്മാരുടെ ഒത്താശ്ശയോടെ നടക്കുന്ന തട്ടിപ്പിലും വെട്ടിപ്പിലും പ്രതിമാസം സര്ക്കാറിന് നഷ്ടമാവുന്നത് കോടികള്.സര്ക്കാര് വകുപ്പുകളിലെ ഉദ്യോഗസ്ഥരും ഭരണ നേതാക്കളും ഉപയോഗിക്കുന്ന ഔദ്യോഗിക വാഹനങ്ങള് നന്നാക്കുന്നതിന്റെ മറവിലാണ് കൊള്ള നടക്കുന്നത്.
വാഹനങ്ങള് നന്നാക്കുന്നതിന് ഗവണ്മെന്റ് അംഗീകൃത വര്ക് ഷോപ്പുകാര് ഈടാക്കുന്നത് പതിന്മടങ്ങ് കൂലി. നിസാര പ്രശ്നങ്ങളുമായി എത്തുന്ന വാഹനങ്ങള്ക്ക് പോലും ഇവിടങ്ങളില് കൂലിയായി നല്കേണ്ടി വരുന്നത് വലിയ തുകയാണ്. ഇതിലൂടെ ഉദ്യോഗസ്ഥരുമൊത്ത് ലാഭം നേടുന്നത് സ്വകാര്യ വര്ക് ഷോപ്പുകളും. ഉദ്യോഗസ്ഥര് വാഹന റിപ്പയറിങ്ങില് അഴിമതി നടത്തുകയും കമ്മീഷന് വാങ്ങുകയും ചെയ്യുന്നതായി നേരത്തെ തന്നെ ആരോപണമുണ്ട്.
തട്ടിപ്പുകാരെ കയ്യോടെ പിടികൂടിയത് മുവാറ്റുപുഴ ബ്ലോക്ക് പഞ്ചായത്ത് പ്രസിഡന്റ് ഡോ. ജോസ് അഗസ്റ്റിന്റെ ഇടപെടലില് . ഉദ്യോഗസ്ഥര് അഴിമതി കാണിക്കുന്നതായി ആരോപിച്ച് മന്ത്രി റോഷി അഗസ്റ്റിന് പ്രസിഡന്റ് പരാതി നല്കിയതിനെ തുടര്ന്ന് ചീഫ് മെക്കാനിക്കല് എഞ്ചിനിയര് വാഹനം പരിശോധിച്ച് റിപ്പോര്ട്ട് നല്കിയപ്പോള് എസ്റ്റിമേറ്റ് തുകയില് കണ്ടത് തട്ടിപ്പിന്റെ ഉദ്യോഗസ്ഥ മുഖമാണ്. വാഹനം നന്നാക്കുന്നതിനുള്ള എസ്റ്റിമേറ്റ് തുക ആറിലൊന്നായി കുറഞ്ഞു.
ഗവണ്മെന്റ് അംഗീകൃത വര്ക് ഷോപ്പുകാര് പതിന്മടങ്ങ് കൂലി ഈടാക്കുന്നതു വഴി കേടായ വാഹനങ്ങള് സ്വകാര്യ വര്ക് ഷോപ്പുകളിലേക്ക് എത്തുന്നത് സ്വാഭാവികമാണ്. ഇതിലൂടയാണ് ഉദ്യോഗസ്ഥര് വാഹന റിപ്പയറിങ്ങില് അഴിമതിയുടെ പുതിയ വാതില് തുറക്കുന്നത്.
മുവാറ്റുപുഴ ബ്ലോക്ക് പഞ്ചായത്ത് പ്രസിഡന്റിന്റെ ഔദ്യോഗിക വാഹനമായ 2014 മോഡല് കെ.എല് 17 കെ.1507 നമ്പറിലുള്ള മഹീന്ദ്ര സൈലോ കാര് കോതമംഗലത്തെ സ്വകാര്യ സ്ഥാപനത്തില് 105000 രൂപ മുടക്കി നന്നാക്കി ഒമ്പത് മാസം തികയുമ്പോഴേക്ക് അടുത്ത പണി വന്നു. ഇത്തവണ പെരുമ്പാവൂരിലെ അംഗീകൃത സ്വകാര്യ വര്ക് ഷോപ്പ് ആവശ്യപ്പെട്ടത് 240000 രൂപയാണ്.
വിറ്റാല് മൂന്നോ നാലോ ലക്ഷം രൂപ മാത്രം കിട്ടുന്ന വാഹനം നന്നാക്കുന്നതില് ഉദ്യോഗസ്ഥര് അഴിമതി കാണിക്കുന്നതായി ആരോപിച്ച് മുവാറ്റുപുഴ ബ്ലോക്ക് പഞ്ചായത്ത് പ്രസിഡന്റ് ഡോ. ജോസ് അഗസ്റ്റിന് മന്ത്രി റോഷി അഗസ്റ്റിന് പരാതി നല്കിയതിനെ തുടര്ന്ന് ചീഫ് മെക്കാനിക്കല് എഞ്ചിനിയര് സ്ഥലത്തെത്തി വാഹനം പരിശോധിച്ച് റിപ്പോര്ട്ട് നല്കിയപ്പോള് എസ്റ്റിമേറ്റ് തുക പാടെ താഴ്ന്നു. പെരുമ്പാവൂരിലെ സ്വകാര്യ വര്ക് ഷോപ്പില് അഴിച്ചിട്ടിരുന്ന യന്ത്രഭാഗങ്ങള് അടക്കം കൂട്ടിഘടിപ്പിച്ച് മുവാറ്റുപുഴയിലെ അംഗീകൃത വര്ക് ഷോപ്പില് എത്തിച്ചപ്പോള് മുടക്ക് 40000 രൂപ മാത്രം. 240000 രൂപയില് നിന്ന് 40000 രൂപയിലേക്ക് പണിക്കൂലി താഴ്ന്നതാണ് അത്ഭുതപ്പെടുത്തുന്നത്. തട്ടിപ്പിന്റെ ആഴം എത്രയെന്ന് ഈ ഒരു സംഭവത്തില് നിന്ന് തന്നെ വ്യക്തം.
ഉദ്യോഗസ്ഥര് വാഹന റിപ്പയറിങ്ങില് അഴിമതി നടത്തുകയും കമ്മീഷന് വാങ്ങുകയും ചെയ്യുന്നതായി നേരത്തെ ആരോപണമുയര്ന്നിരുന്നു. എന്നാല് എസ്റ്റിമേറ്റ് തുക ആറിലൊന്നായി കുറയുന്നത് ഇതാദ്യമാണ്. തദ്ദേശ സ്വയംഭരണ വകുപ്പിന്റെ കീഴിലുള്ള വാഹനങ്ങള് നന്നാക്കുന്നതിനുള്ള ചുമതല ഉദ്യോഗസ്ഥര്ക്ക് പകരം ത്രിതല പഞ്ചായത്തുകളുടെ ഭരണസമിതികളെ ഏല്പ്പിക്കുന്ന പക്ഷം കുറഞ്ഞ ചെലവില് പെട്ടെന്ന് വാഹനം നന്നാക്കി കിട്ടുമെന്ന് മുവാറ്റുപുഴ ബ്ലോക്ക് പഞ്ചായത്ത് പ്രസിഡന്റ് ഡോ. ജോസ് അഗസ്റ്റിന് പറഞ്ഞു.