ഡല്‍ഹി: ലോക്സഭയിലേക്കും നിയമസഭയിലേക്കും ഇനി മത്സരിക്കാനില്ലെന്ന് കെ മുരളീധരന്‍ എംപി. പറഞ്ഞു. തന്റെ സേവനം വേണമോ വേണ്ടയോ എന്ന് പാര്‍ട്ടി തീരുമാനിക്കട്ടെയെന്നും കെ മുരളീധരന്‍ കൂട്ടിചേര്‍ത്തു.
‘തനിക്ക് നോട്ടീസ് നല്‍കിയത് ബോധപൂര്‍വ്വം അപമാനിക്കാനാണ്. പാര്‍ട്ടിക്ക് അവമതിപ്പുണ്ടാക്കിയെന്ന് കാണിച്ചാണ് നോട്ടീസ്. എന്റെ പ്രസ്താവനയില്‍ എന്തെങ്കിലും തെറ്റുകളുണ്ടെങ്കില്‍ കെപിസിസി പ്രസിഡന്റിന് എന്നെ നേരിട്ട് വിളിച്ചു പറയാവുന്നതേയുണ്ടായിരുന്നുള്ളൂ. നേരിട്ടും പറഞ്ഞിട്ടില്ല. ഫോണിലൂടേയും പറഞ്ഞിട്ടില്ല. എന്നെ ഇന്‍സള്‍ട്ട് ചെയ്യുകയെന്ന ലക്ഷ്യത്തോടെയായിരിക്കാം. അത്തരത്തില്‍ ഒരു സംതൃപ്തി അദ്ദേഹത്തിന് കിട്ടിയെങ്കില്‍ എനിക്ക് ഒന്നും പറയാനില്ല.
കഴിഞ്ഞ ദിവസമാണ് കെ മുരളീധരന്‍ എംപിക്കും എംകെ രാഘവനും കെപിസിസി നേതൃത്വം കത്ത് നല്‍കിയിരിക്കുന്നത്. പാര്‍ട്ടിക്കെതിരെ പൊതു വേദിയില്‍ വിമര്‍ശനം ഉന്നയിച്ചതിന് പിന്നാലെയാണ് ഇരുവര്‍ക്കും കത്തയച്ചത്.
