അഗര്‍ത്തല: തെരഞ്ഞെടുപ്പ് വിജയത്തിന് പിന്നാലെ സര്‍ക്കാര്‍ രൂപീകരിക്കാനുളള ചര്‍ച്ചയ്ക്ക് തുടക്കം കുറിച്ച് ബിജെപി. മണിക് സാഹ തന്നെ വീണ്ടും മുഖ്യമന്ത്രിയായേക്കുമെന്നാണ് വിവരം.
അതേസമയം മുഖ്യമന്ത്രി സ്ഥാനത്തേക്ക് വനിതകളെ പരി?ഗണിക്കണമെന്ന ആവശ്യം ശക്തമാണ്. പുരുഷ വോട്ടര്‍മാരേക്കാള്‍ കൂടുതല്‍ സ്ത്രീ വോട്ടര്‍മാര്‍ ഉളളതിനാലാണ് വനിത മുഖ്യമന്ത്രി വേണമെന്ന ആവശ്യമുയര്‍ന്നത്. വടക്ക് കിഴക്കന്‍ സംസ്ഥാനങ്ങളില്‍ നിന്നും ഇതുവരെ വനിതാ മുഖ്യമന്ത്രി ഉണ്ടായിട്ടില്ല. ബിജെപി ദേശീയ നേതൃത്വം അംഗീകരിക്കുകയാണെങ്കില്‍ വനിതകള്‍ക്കിടയില്‍ നിന്ന് കേന്ദ്ര സാമൂഹികക്ഷേമ വകുപ്പ് മന്ത്രി പ്രതിമ ഭൗമിക്കിനാകും മുഖ്യമന്ത്രി സ്ഥാനത്തേക്ക് നറുക്ക് വീഴുക.
‘മാറ്റം’ എന്ന മുദ്രാവാക്യമുയര്‍ത്തിയായിരുന്നു ബിജെപിയുടെ തെരഞ്ഞെടുപ്പ് പ്രചരണം. ഒമ്പത് മാസങ്ങള്‍ക്ക് മുമ്പ് ആണ് ബിപ്ലവ് കുമാറിനെ മാറ്റി മുഖ്യമന്ത്രിയായി മണിക് സാഹയെ ബിജെപി നിയോഗിച്ചത്. കോണ്‍ഗ്രസ് വിട്ട് ബിജെപിയിലെത്തിയ മണിക് സാഹ പരസ്പരം പോരടിച്ചു നിന്ന നേതാക്കളെ ഒരുമിച്ചു നിര്‍ത്തുന്നതില്‍ വിജയിച്ചിരുന്നു.
സിപിഐഎം-കോണ്‍ഗ്രസ് സഖ്യം കൊണ്ട് ശ്രദ്ധേയമായ ത്രിപുര തെരഞ്ഞെടുപ്പില്‍ ബിജെപിക്കായിരുന്നു വിജയം. 60 അംഗ നിയമസഭയില്‍ 32 സീറ്റുകള്‍ ബിജെപി നേടി. ബിജെപി സഖ്യകക്ഷിയായ ഐപിഎഫ്ടി ഒരു സീറ്റിലും വിജയിച്ചു. സിപിഐഎംകോണ്‍ഗ്രസ് സഖ്യം 14 സീറ്റുകളിലാണ് വിജയിച്ചത്. ആദ്യമായി നിയമസഭ തെരഞ്ഞെടുപ്പ് ഗോദയിലെത്തിയ തിപ്ര മോത്ത 13 സീറ്റുകള്‍ നേടിയിട്ടുണ്ട്.
