സ്റ്റുഡന്റ് വിസ ഉള്പ്പെടെ താല്ക്കാലിക വിസകളില് ഓസ്ട്രേലിയയിലെത്തുന്നവര്ക്ക് പെര്മനന്റ് റെസിഡന്റ്സി ലഭിക്കുന്ന തോത് കുറഞ്ഞു വരികയാണെന്ന് ഗ്രാറ്റന് ഇന്സ്റ്റിറ്റ്യൂട്ടിന്റെ പഠന റിപ്പോര്ട്ട്. പത്തു വര്ഷം മുമ്പുള്ളതിനെക്കാള് കുറഞ്ഞ വരുമാനമാണ് പുതിയ കുടിയേറ്റക്കാര്ക്ക് ഓസ്ട്രേലിയയില് ലഭിക്കുന്നതെന്നും റിപ്പോര്ട്ട് ചൂണ്ടിക്കാട്ടുന്നു. ഓസ്ട്രേലിയന് സര്ക്കാരുകളുടെ നയരൂപീകരണത്തിന് ദിശാബോധം നല്കുന്ന സ്ഥാപനങ്ങളിലൊന്നാണ് മെല്ബണ് ആസ്ഥാനമായുള്ള ഗ്രാറ്റന് ഇന്സ്റ്റിറ്റ്യൂട്ട്. ഓസ്ട്രേലിയന് തൊഴില് രംഗത്തെ കുടിയേറ്റക്കാരുടെ പങ്കാളിത്തത്തെക്കുറിച്ചാണ് ഇന്സ്റ്റിറ്റ്യൂട്ട് പുതിയ പഠന റിപ്പോര്ട്ട് പുറത്തിറക്കിയിരിക്കുന്നത്.
താല്ക്കാലിക- സ്കില്ഡ് വിസകളിലെത്തുന്നതില് പകുതി പേരും, സ്റ്റുഡന്റ് വിസകളിലെത്തുന്നതില് അഞ്ചിലൊന്ന് പേരും ഓസ്ട്രേലിയന് പെര്മനന്റ് റെസിന്റായി മാറിയെന്നാണ് മുന്കാല കണക്കുകള് വ്യക്തമാക്കുന്നതെന്ന് റിപ്പോര്ട്ട് ചൂണ്ടിക്കാട്ടി. എന്നാല്, സ്റ്റുഡന്റ് വിസകളിലുള്ളവരുടെ എണ്ണം ഇക്കഴിഞ്ഞ ദശാബ്ദത്തില് വന്തോതില് വര്ദ്ധിച്ചെങ്കിലും, PR ലഭിക്കുന്നവരുടെ എണ്ണം ആനുപാതികമായി കൂടിയിട്ടില്ല. താല്ക്കാലിക- സ്കില്ഡ് വിസകളിലുള്ളവര്ക്കും PR ലഭിക്കുന്നതിന്റെ തോത് കുറഞ്ഞുവരുന്നതായും റിപ്പോര്ട്ട് ചൂണ്ടിക്കാട്ടുന്നു.
ഓസ്ട്രേലിയയിലെ പല തൊഴില്മേഖലകളിലും താല്ക്കാലിക വിസകളിലുള്ളവര്ക്ക്, ആ തൊഴില് പരിചയം അടിസ്ഥാനമാക്കി PRന് അപേക്ഷിക്കാനുള്ള അവസരം (pathway) ഇപ്പോള് ലഭിക്കുന്നില്ല. 1996 മുതല് 2017 വരെയുള്ള കാലഘട്ടത്തില് താല്ക്കാലിക വിസകളിലുണ്ടായിരുന്ന ഭൂരിഭാഗം പേര്ക്കും PRന് അപേക്ഷിക്കാനുള്ള അവസരം ലഭിച്ചിരുന്നു. എന്നാല് ഈ പാത്ത് വേയില് നിന്ന് പല തൊഴില് മേഖലകളെയും സമീപകാലത്ത് ഒഴിവാക്കിയിട്ടുണ്ട്.
ഇതുകാരണം, താല്ക്കാലിക വിസകളിലുള്ളവര്ക്ക് ഭാവിയില് PR ലഭിക്കാനുള്ള അവസരം കുറയുമെന്നും റിപ്പോര്ട്ട് ചൂണ്ടിക്കാട്ടി. കൊവിഡ് മൂലം അതിര്ത്തി അടയ്ക്കുന്നതിന് മുമ്പുള്ള സമയത്ത് രാജ്യത്തുള്ള രാജ്യാന്തര വിദ്യാര്ത്ഥികളുടെ എണ്ണം ചരിത്രത്തിലെ ഏറ്റവും ഉയര്ന്ന നിലയിലായിരുന്നുവെന്നും, എന്നാല് അതില് PRന് അവസരം ലഭിച്ചവര് വളരെ കുറവായിരുന്നുവെന്നും ഗ്രാറ്റന് ഇന്സ്റ്റിറ്റ്യൂട്ടിലെ കുടിയേറ്റവിഭാഗം ഡെപ്യൂട്ടി പ്രോഗ്രാം ഡയറക്ടര് ഹെന്റി ഷെറെല് പറഞ്ഞു.
വരുമാനവും കുറഞ്ഞു ഓസ്ട്രേലിയന് തൊഴില്രംഗത്ത് കുടിയേറ്റ വിഭാഗത്തിന്റെ പ്രാതിനിധ്യം എത്രത്തോളമാണെന്നും റിപ്പോര്ട്ട് പരിശോധിക്കുന്നുണ്ട്. ഓസ്ട്രേലിയന് തൊഴില് രംഗത്തുള്ളതില് മൂന്നില് ഒരാള് വീതം വിദേശത്ത് ജനിച്ചവരാണ്. അഞ്ചില് ഒരാള് വീതം PR വിസയിലോ, താല്ക്കാലിക വിസയിലോ ഇവിടെ ജീവിക്കുന്നവരുമാണ്. ഓസ്ട്രേലിയന് തൊഴില്മേലയുടെ ഏഴു ശതമാനവും താല്ക്കാലിക വിസകളിലുള്ളവരാണെന്നും റിപ്പോര്ട്ട് പറയുന്നു.
ഉന്നത വിദ്യാഭ്യാസമുള്ളവരുടെ എണ്ണം കുടിയേറ്റ വിഭാഗത്തില് കൂടി വരുന്നു എന്നാണ് കണ്ടെത്തല്. ”കുടിയേറ്റക്കാരില് പകുതിയോളം പേരും ബിരുദമോ, ബിരുദാനന്തര ബിരുദമോ ഉള്ളവരാണ്. പലരും ഇവിടെ കൂടുതല് വിദ്യാഭ്യാസം നേടുകയും ചെയ്യുന്നു.” – റിപ്പോര്ട്ട് വ്യക്തമാക്കി. ഓസ്ട്രേലിയയില് ജനിച്ചവര്ക്കിടയില് ബിരുദാനന്തര ബിരുദമുള്ളവരുടെ അനുപാതം പത്തില് ഒന്നു മാത്രമാണെങ്കില്, അടുത്ത കാലത്ത് ഓസ്ട്രേലിയയിലേക്ക് കുടിയേറിയതില് നാലിലൊന്ന് പേരും ബിരുദാനന്തര ബിരുദം നേടിയവരാണ്.
എന്നാല്, അതിന് അനുസരിച്ചുള്ള വരുമാനം കുടിയേറ്റക്കാര്ക്ക് ലഭിക്കുന്നില്ല. പുതിയ കുടിയേറ്റക്കാര്ക്ക് ലഭിക്കുന്ന വരുമാനം പത്തു വര്ഷം മുമ്പുള്ളതിനെക്കാള് കുറവാണെന്നും റിപ്പോര്ട്ടില് കണ്ടെത്തലുണ്ട്. രാജ്യാന്തര വിദ്യാര്ത്ഥികള്ക്കും, പുതുതായി ജോലിയില് പ്രവേശിക്കുന്നവര്ക്കും ലഭിക്കുന്ന ശമ്പളം കുറവായതാണ് ഇതിന് കാരണം. ഓസ്ട്രേലിയന് സാമ്പത്തിക രംഗത്തിന് കുടിയേറ്റക്കാര് നല്കുന്ന സംഭാവനകള് വ്യക്തമാക്കാനും, നയരൂപീകരണത്തില് സഹായിക്കാനുമാണ് ഈ റിപ്പോര്ട്ട് ശ്രമിക്കുന്നതെന്ന് ഗ്രാറ്റന് ഇന്സ്റ്റിറ്റ്യൂട്ട് വ്യക്തമാക്കി.