കൊച്ചി: ബ്രഹ്മപുരം മാലിന്യപ്ലാന്റിലെ തീപിടിത്തത്തെക്കുറിച്ച് സിറ്റി പൊലീസ് അന്വേഷണം തുടങ്ങി. ഇന്‍ഫോപാര്‍ക്ക് പൊലീസ് രജിസ്റ്റര്‍ ചെയ്ത കേസില്‍ തൃക്കാക്കര എസിപി പി വി ബേബിക്കാണ് അന്വേഷണച്ചുമതല. പ്ലാന്റിലെ തൊഴിലാളികള്‍, കരാറുകാര്‍ തുടങ്ങിയവരുടെ മൊഴിയെടുക്കും. ഏക്കറുകണക്കിന് പ്ലാസ്റ്റിക് മാലിന്യം കത്തിയ സംഭവത്തിലെ ദുരൂഹത അന്വേഷിക്കും.
ബ്രഹ്മപുരം മാലിന്യശാലയിലെ തീപിടിത്തം ആസൂത്രിതമെന്ന സംശയം ബലപ്പെടുന്നതായി നേരത്തെ റിപ്പോര്‍ട്ടുകള്‍ ഉണ്ടായിരുന്നു. മാലിന്യം ബയോ മൈനിങ് ചെയ്യാന്‍ കോര്പറേഷന് അനുമതി നല്‍കിയതില്‍ അഴിമതി ആരോപിച്ച് മൂവാറ്റുപുഴ വിജിലന്‍സ് കോടതിയില്‍ കേസ് വന്നതിനു പിന്നാലെയാണ് തീപിടിത്തം ഉണ്ടായത്. മാലിന്യമലയില്‍ ഏഴിടത്തുനിന്നാണ് തീപടര്‍ന്നത്. തീയണക്കാന്‍ അടിയന്തര നടപടി ഉണ്ടായില്ലെന്നും ആരോപണമുണ്ട്.
തീപിടിത്തത്തില്‍ കൊച്ചി കോര്പറേഷന് മലിനീകരണ നിയന്ത്രണ ബോര്‍ഡ് 1.81 കോടി രൂപ പിഴ ചുമത്തിയിരുന്നു. പ്ലാന്റില്‍ നടപടിക്രമങ്ങള്‍ പാലിക്കുന്നതില്‍ ഗുരുതര വീഴ്ചയുണ്ടായെന്നും ഫയര്‍ ഹൈഡ്രന്റുകള്‍ പ്രവര്‍ത്തിച്ചിട്ടില്ലെന്നും പിസിബി കണ്ടെത്തിയിരുന്നു. തീ പിടിത്തത്തില്‍ ഹൈക്കോടതി സ്വമേധയാ കേസെടുക്കുകയും ചെയ്തിരുന്നു.
