ന്യൂഡല്ഹി: വിചാരണ തീരും വരെ കേരളത്തില് ചികിത്സ അനുവദിക്കാനുള്ള പിഡിപി ചെയര്മാന് അബ്ദുന്നാസിര് മഅ്ദനിയുടെ അപേക്ഷ സുപ്രീംകോടതി വെള്ളിയാഴ്ച പരിഗണിക്കും. ചൊവ്വാഴ്ച ചീഫ് ജസ്റ്റിസ് ഡി വൈ ചന്ദ്രചൂഡ് മുമ്പാകെ മഅ്ദനിക്കുവേണ്ടി ഹാജരായ സുപ്രീംകോടതി അഭിഭാഷകന് അഡ്വ ഹാരിസ് ബീരാന് കേസ് അടിയന്തരമായി പരിഗണിക്കണമെന്ന് ആവശ്യപ്പെടുകയായിരുന്നു.
2014ല് ജാമ്യം അനുവദിച്ചപ്പോള് മുന്നോട്ടുവെച്ച വ്യവസ്ഥകളില് ജന്മനാട്ടിലേക്ക് പോകാനായി ഇളവ് ചെയ്യണമെന്നാണ് മഅ്ദനി ഹര്ജിയില് ആവശ്യപ്പെട്ടിരിക്കുന്നത്. നാലു മാസത്തിനകം തീര്ക്കുമെന്ന് കര്ണാടക സര്ക്കാര് സുപ്രീംകോടതിക്ക് ഉറപ്പുനല്കിയ വിചാരണ എട്ടു വര്ഷം കഴിഞ്ഞിട്ടും നീണ്ടുപോകുകയാണെന്നും ആരോഗ്യാവസ്ഥ മോശമായി ബംഗളൂരുവില് വീട്ടുതടങ്കലിന് സമാനമായ സ്ഥിതിയിലാണെന്നും മഅ്ദനി ഹര്ജിയില് ബോധിപ്പിച്ചു.
താന് നേരിടുന്ന നിരവധി രോഗങ്ങളുടെ പട്ടിക മഅ്ദനി സുപ്രീംകോടതി മുമ്പാകെ നിരത്തി. ക്രിയാറ്റിന് നില ഉയര്ന്ന് ഡയാലിസിസ് നടത്തേണ്ട സാഹചര്യമാണ്. വൃക്ക മാറ്റിവെക്കേണ്ടിവരുമെന്ന് ഡോക്ടര്മാര് പറയുന്നുണ്ട്. അനുകൂലമല്ലാത്ത കാലാവസ്ഥയും ചുറ്റുപാടും അധിക സാമ്പത്തിക ബാധ്യതയും നിരവധി രോഗങ്ങള് അലട്ടുന്ന തന്റെ ആരോഗ്യസ്ഥിതിയെ അങ്ങേയറ്റം ബാധിച്ചിരിക്കുന്നുവെന്നും മദനിയുടെ ഹര്ജിയില് വ്യക്തമാക്കി.