തിരുവനന്തപുരം: എല്ഡിഎഫ് കണ്വീനര് ഇ പി ജയരാജനെതിരെ കേസെടുക്കാന് കോടതി ഉത്തരവ്. മുഖ്യമന്ത്രി പിണറായി വിജയനെതിരെ വിമാനത്തില് യൂത്ത് കോണ്ഗ്രസ് പ്രവര്ത്തകര് പ്രതിഷേധിച്ചതിനേത്തുടര്ന്നുണ്ടായ സംഭവങ്ങളില് തിരുവനന്തപുരം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയാണ് കേസെടുക്കാന് വലിയ തുറ പൊലീസിനോട് ഉത്തരവിട്ടത്. വധശ്രമം, ക്രിമിനല് ഗൂഢാലോചന എന്നീ വകുപ്പുകള് ചുമത്താനാണ് പൊലീസിന് നിര്ദ്ദേശം നല്കിയിരിക്കുന്നത്. ഇതിനൊപ്പം മുഖ്യമന്ത്രിയുടെ രണ്ട് പേഴ്സണല് സ്റ്റാഫിനെതിരേയും കേസെടുക്കും. യൂത്ത് കോണ്ഗ്രസ് പ്രവര്ത്തകരുടെ ഹര്ജിയിലാണ് നടപടി.
വിമാനത്തില് വെച്ച് ഇ പി ജയരാജനും മുഖ്യമന്ത്രിയുടെ പേഴ്സണല് സ്റ്റാഫും ക്രൂരമായി മര്ദ്ദിച്ചെന്ന് യൂത്ത് കോണ്ഗ്രസ് പ്രവര്ത്തകരായ ഫര്സീന് മജീദും നവീന് കുമാറും ആരോപിച്ചിരുന്നു. ഇക്കാര്യങ്ങള് ചൂണ്ടിക്കാട്ടി യൂത്ത് കോണ്ഗ്രസ് പ്രവര്ത്തകര് കോടതിയില് ഹര്ജി നല്കുകയും ചെയ്തിരുന്നു.നേരത്തെ സംഭവത്തില് ഇ പി ജയരാജനെതിരേയും യൂത്ത് കോണ്ഗ്രസ് പ്രവര്ത്തകര്ക്കെതിരേയും ഇന്ഡിഗോ എയര്ലൈന്സ് നടപടിയെടുത്തിരുന്നു. ഇ പി ജയരാജന് മുന്ന് ആഴ്ചത്തെ വിലക്കും യൂത്ത് കോണ്ഗ്രസ് പ്രവര്ത്തകര്ക്ക് രണ്ട് ആഴ്ചത്തെ വിലക്കുമാണ് ഏര്പ്പെടുത്തിയിരുന്നത്. യൂത്ത് കോണ്ഗ്രസ് പ്രവര്ത്തകര് ഏവിയേഷന് നിയമങ്ങള് പ്രകാരമുള്ള ലെവല് ഒന്ന് കുറ്റങ്ങളും, ഇ പി ജയരാജന് ലെവല് രണ്ട് കുറ്റവുമാണ് നടത്തിയതെന്നായിരുന്നു ഇന്ഡിഗോ എയല്ലൈന്സിന്റെ കണ്ടെത്തല്.