Home Crime & CourtCourt ബാലഭാസ്‌കറിന്റെ മരണം; നുണപരിശോധന നടത്തണമെന്ന ആവശ്യത്തില്‍ സാക്ഷികളുടെ നിലപാട് ഇന്ന് കോടതിയെ അറിയിക്കും
RASHTRADEEPAM, NEWS, KERALA, CINEMA, MALAYALAM, POLITICS, MEDIA, WESITE, ONLINE, DAILY, HEALTH

ബാലഭാസ്‌കറിന്റെ മരണം; നുണപരിശോധന നടത്തണമെന്ന ആവശ്യത്തില്‍ സാക്ഷികളുടെ നിലപാട് ഇന്ന് കോടതിയെ അറിയിക്കും

by Rashtradeepam Desk

ബാലഭാസ്‌കറിന്റെ മരണത്തില്‍ നുണപരിശോധന നടത്തണമെന്ന സി.ബി.ഐ ആവശ്യത്തില്‍ സാക്ഷികളുടെ നിലപാട് ഇന്ന് കോടതിയെ അറിയിക്കും. ബാലഭാസ്‌കറിന്റെ സുഹൃത്തുക്കളടക്കം നാല് പേരാണ് പരിശോധനക്ക് തയ്യാറാണോയെന്ന് തിരുവനന്തപുരം സിജെഎം കോടതിയെ അറിയിക്കുക.

ബാലഭാസ്‌കറിന്റെ സുഹൃത്തുക്കളായ പ്രകാശന്‍ തമ്പിയും വിഷ്ണു സോമസുന്ദരവും അപകട യാത്രയില്‍ ഒപ്പമുണ്ടായിരുന്ന ഡ്രൈവര്‍ അര്‍ജ്ജുന്‍, ദൃക്‌സാക്ഷിയെന്ന് അവകാശപ്പെടുന്ന കലാഭവന്‍ സോബി എന്നിവരാണ് കേസില്‍ നുണപരിശോധനക്ക് സമ്മതമാണോയെന്ന് അറിയിക്കുക. ആദ്യഘട്ടത്തില്‍ ഈ നാല് പേരെ നുണ പരിശോധനക്ക് വിധേയമാക്കാനാണ് സി.ബി.ഐ തീരുമാനം. സി.ബി.ഐയുടെ അപേക്ഷ പരിഗണിച്ച കോടതി ഈ നാല് പേരോടും ഇന്ന് നേരിട്ട് ഹാജരാകാന്‍ ആവശ്യപ്പെട്ടിരിക്കുകയാണ്. നാല് പേരെയും നുണപരിശോധനയ്ക്ക് വിധേയമാക്കണമെന്ന് ആവശ്യപ്പെട്ട് സി.ബി.ഐ നേരത്തെ കോടതിയില്‍ അപേക്ഷ നല്‍കിയിരുന്നു. നാല് പേരും ഇന്ന് നേരിട്ട് ഹാജരായി നിലപാട് അറിയിക്കാനാണ് ചീഫ് ജ്യുഡീഷ്യല്‍ മജിസ്‌ട്രേറ്റ് കോടതി ഉത്തരവിട്ടിരുന്നത്.

ബാലഭാസ്‌കറിന്റെ അപകട മരണത്തിന് ശേഷം പ്രകാശന്‍ തമ്പിയും വിഷ്ണു സോമസുന്ദരവും സ്വര്‍ണ്ണക്കടത്ത് കേസില്‍ പ്രതികളായതോടെ ഇരുവര്‍ക്കും മരണത്തില്‍ പങ്കെന്ന ആരോപണവുമായി ബാലഭാസ്‌കറിന്റെ കുടുംബം രംഗത്തെത്തിയിരുന്നു. അപകട സമയത്ത് വാഹനമോടിച്ചിരുന്നതായി കരുതുന്ന അര്‍ജ്ജുന്‍ പിന്നീട് മൊഴിയില്‍ മലക്കം മറിഞ്ഞു. സംഭവം കൊലപാതകമാണെന്നാണ് അപകടത്തിന്റെ ദൃക്‌സാക്ഷിയെന്ന് അവകാശപ്പെടുന്ന കലാഭവന്‍ സോബി സി.ബി.ഐ സംഘത്തിന് മൊഴി നല്‍കിയത്. ഇക്കാര്യങ്ങള്‍ മുന്‍ നിര്‍ത്തിയാണ് നാല് പേര്‍ക്കും നുണപരിശോധന നടത്താന്‍ സി.ബി.ഐ തീരുമാനിച്ചത്.

പരിശോധനക്ക് തയ്യാറാണെന്ന് സോബി നേരത്തെ തന്നെ വ്യക്തമാക്കിയിരുന്നു. മറ്റ് മൂന്ന് പേരുടെ നിലപാടാണ് ഇനി നിര്‍ണ്ണായകം. നുണപരിശോധനയ്ക്ക് സമ്മതം അറിയിക്കുന്നവര്‍ക്ക് കൊച്ചിയിലോ തിരുവനന്തപുരത്തോ പരിശോധന നടത്താനാണ് സി.ബി.ഐ ആലോചിക്കുന്നത്.

 

Related Posts

error: Content is protected !!